Махсус имкониятлар
Тойлоқ туман ҳокими Баҳодир Бобоназаровнинг туман аҳолисига
МУРОЖААТИ
Ҳурматли тумандошлар!
Бугунги кунда дунёдаги аксар мамлакатлар қатори Ўзбекистон ҳам ташвишли кунларни бошидан кечирмоқда. Коронавирус пандемияси тарқалган давлатлар ва ушбу касалликка чалинган одамлар сони тўхтовсиз ошиб бормоқда. Бундай шароитда фақат аҳиллик ва ҳамжиҳатликни таъминлаш, машъум хасталикни бартараф этиш учун бир ёқадан бош чиқариб ҳаракат қилиш ўта муҳимдир.
Туманимизда ҳам ушбу ўта юқумли касалликнинг олдини олиш, хорижда бўлиб қайтганларни карантин ҳолатида сақлаш чоралари кўрилмоқда. Ўзбекистон Республикаси Президенти Шавкат Мирзиёев 18 март куни маҳалла ва оила масалаларига бағишланган видеоселектор йиғилишида коронавирус муаммоси ҳақида айтган сўзлари ҳаммамизга далда бўлди. “Бу ҳаётнинг кўп оғир синовларини ва яхши-ёмон кунларини бошидан кечирган халқимиз ҳаммасини тўғри тушуниб, масалага онгли ёндашмоқда. Муфтият раҳбарлигида диний уламолар юртимизга тинчлик-хотиржамлик, беморларга шифо тилаб, дуои фотиҳалар қилишмоқда. Миллати, тили ва динидан қатъи назар, ҳаммамиз якдилмиз ва, ишонамизки, бу қийинчиликлар, албатта, ўтиб кетади.”
Чиндан ҳам бугунги кунда бутун мамлакатда хавфли ва юқумли инфекциянинг олдини олиш юзасидан кескин чоралар кўрилмоқда. Жойларда ҳокимлар раҳбарлигида махсус штаблар ташкил этилган. Эпидемиологик вазият бўйича ҳар соатлик ва кунлик маълумот таҳлил қилиниб, тезкор чоралар кўрилмоқда. Тиббиёт муассасалари фавқулодда иш режимига ўтказилди. Сиҳатгоҳ ва оромгоҳлар карантин муассасалари сифатида мослаштирилди. Тиббиёт масканлари дори-дармон, ҳимоя ва диагностика воситалари билан етарли даражада таъминланди.
Мактабгача таълим, умумий ўрта таълим, ўрта махсус ва олий таълим масканларида карантин тизимининг жорий этилиши аввало, фарзандларимиз, қолаверса, барчамизнинг саломатлигимизни сақлаш учун қаратилган умумдавлат миқёсидаги кенг кўламли чора-тадбирлардан биридир. Бундан ташқари, карантин муносабати билан уйда ўтириши лозимлиги, кўчага чиққан тақдирда махсус ниқоб тақиб чиқиш кераклиги хусусида бот-бот огоҳлантирилаётган бўлса-да, айрим фуқароларимиз ҳали ҳам вазиятни тўлақонли англаб етмаётганликларига гувоҳ бўлаяпмиз. Орамизда қариндош-уруғлариникига борди-келди қилаётган, кўчага ниқобсиз чиқаётган, карантин ҳолатига беписандлик билан қараётган кишиларни учратяпмиз. Тантаналар ва оммавий тадбирларни бекор қилишдан мақсад Сиз ва бизнинг саломатлигимизни сақлашдан иборатдир. Битта инфекцияга чалинган бемор юзлаб кишиларга касалликни юқтириши мумкин эканлигини ёдингиздан чиқарманг!
Кейинги пайтларда шифохоналарда ҳам карантин тартиби жорий этилиши муносабати билан беморларни қабул қилишнинг янги йўналишлари белгиланди.Унга кўра киши бетобланиб қолганда ўзи ёки яқинлари “Тез тиббий ёрдам” хизматига телефон орқали мурожаат қилишлари керак. Бироқ, кўпчилик бу ҳаракатнинг тескарисини қилишмоқда. Бу ҳол айни пайтда коронавирус хавфи билан курашаётган шифокорлар хизматида янги муаммоларни келтириб чиқармоқда. Қолаверса, шифохонада даволаниш учун ётган беморларнинг яқинлари егулик кўтариб, уни кўриш учун келаётганлари юртимизда ҳукм сураётган нохуш вазиятни янада қийинлаштирмоқда, карантин талабларини бузишмоқда.
Қадрли тумандошлар!
Бу қийинчиликларни, албатта, енгиб ўтамиз. Бунинг учун биз барча имкониятларни ишга соламиз. Сиз ҳам бу ташвишли кунлар тезроқ ортда қолишида ўз ҳиссангизни қўшинг! Айни дамда Сизнинг энг катта ёрдамингиз уйда бўлишингиздир. Ўзингизни ва яқинларингизни ҳар қандай хавфдан эҳтиёт қилинг. Яна бир бор карантин талабларига ҳамда гигиена қоидаларига қатъий риоя қилишингизни сўраймиз. Бугунги ташвишли кунлар ортда қолиб, эртанги ёруғ онлар келганда бир-биримизни юзимизга дадил ва меҳр билан боқиш барчамизга насиб этсин, илоҳим.
