Namanganda 4-xalqaro Asal festivali — asalarichilik sohasidagi yutuqlar namoyishi

Namangan shahrida bo‘lib o‘tayotgan 4-xalqaro Asal festivali mamlakatimizda asalarichilik sohasini rivojlantirish, tajriba almashish va sifatli milliy mahsulotlarni targ‘ib etishga xizmat qilmoqda.
Mazkur nufuzli tadbirda toyloqlik “Orzu Olim Dilmurod” asalarichilik fermer xo‘jaligi rahbari Orif bobo, tumandagi boshqa ilg‘or asal yetishtiruvchilar hamda tuman hokimi o‘rinbosari Jahongir Sattorov ham faol ishtirok etmoqda.
Festival doirasida asalarichilik sohasidagi innovatsion yondashuvlar, yangi texnologiyalar, eksport salohiyatini oshirish masalalari muhokama qilinmoqda. Shuningdek, viloyat va tumanlarda ishlab chiqarilayotgan turli asal mahsulotlari, mum, propolis, asalari sharbati va boshqa tabiiy mahsulotlar ko‘rgazmalarda namoyish etilmoqda.
Tadbir davomida tuman asal yetishtiruvchilari o‘z mahsulotlarini taqdim etib, mahalliy brend sifatida e’tirof etildi. Shuningdek, xorijiy ishtirokchilar bilan investitsion hamkorlik va eksport aloqalarini kengaytirish bo‘yicha muzokaralar ham olib borilmoqda.
Tuman hokimi o‘rinbosari Jahongir Sattorov ta’kidlaganidek:
“Asalarichilik — bu nafaqat iqtisodiy foyda, balki sog‘lom hayot, tabiiylik va mehnatsevarlik ramzidir. Biz bu sohada har bir fermer uchun yangi imkoniyatlar yaratishga intilamiz.”
Festival yakunida eng yaxshi asal ishlab chiqaruvchilar, ilg‘or texnologiyalarni joriy etgan fermer xo‘jaliklari va soha rivojiga hissa qo‘shgan mutaxassislar taqdirlanadi.